சிறுவட்டம் தாண்டி
குண்டுச்சட்டியில்
குதிரை ஓட்டிக் களைத்து வீழ்ந்த
நண்பர்கள்
விழிகளை வீசித் தேடினர்
சக குண்டு சட்டிகளை
குண்டுச்சட்டி சிறுவட்டம் வழி
வான்துண்டொன்று எட்டிப்பார்த்தது
மல்லாந்து கிடந்த நண்பர்களை
விண்வெளியின் விரிவே
ஒரு துண்டு வட்டமென்ற புரிதலில்
வாழ்வின் இன்பங்களைத் தேடி
வட்டமடி தொழிலில்
மீண்டும்
குதிரைகள் மீதேறி வலம்
முகமறியா ராசகுமாரன் வருகை தவத்தில்
துதிபாடலுடன் ஒருவர் பின் ஒருவராக
குண்டுச்சட்டியின் விரிந்த வயிற்றில்
பழகிய வட்டப்பாதையின்
வரிசைக் கிரம சுற்றுதலில்
நண்பர்கள்
குண்டுச் சட்டி தொப்பையடியில்
குருதிப் பிதுக்கி வெளியேற்றும்
இந்திரியநாற்ற முகர்வில் முகஞ்சுளித்து
வலம் வந்த நண்பனுக்கு மட்டும்
வானம் தன் இருப்பை அறிவித்தது
சிறுவட்டமருகே வந்த பறவையொன்றினால்
குத்தித் தூக்கி வானில் மிதக்க வைத்து
வானின் விரிவுகளில்
பறவை சவாரி பிரும்மாண்டத்தில்
மீண்டுமொரு வட்டப்பாதை வாழ்க்கை
விரும்பா நண்பனோ
பறவையிடம் கூக்குரலிட்டான் -
சிறகுகள் தா
என்னைத் தூக்கிச் சுமக்காதே
தோளில் துளைத்த அலகில்
வலிக்க வலிக்க
பிய்ந்து தொங்கும் சதைகள்
வடிந்து உறையும் குருதியோட்டம்
உயிர் பிய்க்கும் பிரசவம்
தோள் கிழித்து வந்ததொரு உறுப்பு
கண்மூடி வலி தாங்கிக் கிடந்த மனம்
உலுப்பி விட்டது
பற பற
இறக்கை வீசி வீசி
பற பற
விட்டுப் போன இடத்திலிருந்து பற
பிறந்ததன் பொருளறிந்து பற
பற பற
இறக்கை வீசி வீசி
பற பற
அடிவானம் தொட விரியும் இறக்கை
துருவங்கள் தொட நீளும் இறக்கை
பிரபஞ்ச வெடிப்பு தேடும் இறக்கை
வீசி வீசி
பற
வீசி வீசி
பற
புதிதாய் வந்த விடுதலை கொண்டு
பறந்து பறந்தே மரணம் வரை
பற
புவியீர்ப்பு விசைக்கு
உடல் பணியும் வரை
பற.
பறந்து திரியும் வாழ்வறியா
குண்டுசட்டி குதிரையோட்டிகள்
தலைவன் துதியோதி
அதே
வட்ட பாதையில்
அதே
வாழ்க்கையில்.
அறிந்திருக்கவில்லை
அந்த அவர்கள்
குண்டுசட்டியின் சிறுவட்டம் தாண்டி
விரிந்திருக்கும்
பிறிதொரு வாழ்தலின் உன்னதம்.
அவர்கள்
என்றும் போல்
என்றும் போல்
என்றும் போல்
மூடராய்.
6 comments:
கவிதையின் வடிவம் புதியதாக உணர்கிறேன். உலகில் தங்களை மட்டும் அறிவுஜீவிகளாக நினைத்து வாழும் அறிவீலிகளை தோலுரித்துக் காட்டியிருக்கிறது கவிதை. உலகம் பரந்தது தேடல் உள்ள அனைவருக்கும் பொதுவானது. தேடலில்லா வாழ்க்கை என்பது மரணத்திற்கு பிறகான வாழ்க்கை மட்டுமே.....
விரிவான கருத்துகளோடு பிறகு வருகிறேன்
நன்றி முத்து.
விரிவான கருத்துகளை எழுதுங்கள்.
மிகவும் நல்ல கவிதை என்று மட்டும் தெரிகிறது. ஆனால் பகுத்தறிந்து பொருள் புரியத் தெரியவில்லை.
(எங்க அப்பத்தா தமிழபடி தமிழபடின்னு தலை தலையா அடிச்சுகிச்சு. நான் கேட்டாதானே?!)
நன்றி மூர்த்தி.
இந்தக் கவிதை யாரைப் பற்றி எதைப் பற்றி பேசுகிறது என்று உங்களுக்குப் புரியவில்லை என்றால் நான் என்ன செய்வது?
சிற்றிதழ்களே உலகம் என்றும், அதன் நிறுவனர்களே தங்களை மீட்டெடுக்கும் ராசகுமாரன் என்றும் நம்பிக் கொண்டு வாழும் படைப்பாளிகளைத் தான் சொல்லி இருக்கிறேன் - சிறு வட்டங்களை விட்டு வெளியேறி வானத்தில் இறக்கை வீசி பறக்கச் சொல்லி....
இது இணைய தளங்களுக்கும் பொருந்தும். இன்னும் சொல்லப் போனால் எங்கெங்கு படைப்புகள் பிரசவிக்கப்படுகின்றனவோ அங்கெல்லாம் இது பொருந்தும்.
இப்பொழுது படித்துப் பாருங்கள் - விளங்காத பொருளெல்லாம் விளங்கும்....
அன்புடன்
நண்பன்
தோழர் நண்பன்
கவிதைகள் சிறப்பான வடிவில் உள்ளது.
பெசு பொருள் சித்தனைக்குரியது வாழ்த்துகள்.
தொடர்ந்து எழுதுங்கள்.
எழுதப்படுபவைகளே பதிவு பெறும்.. நம் சிந்தனைகள் பதியப்பட வேண்டும்
நன்றி இசாக்.
Post a Comment